हिरवी नव्हाळी तुझ्या यौवनाची
स्पर्शून अवखळ हवा वाहते
दवबिंदू पडता कायेवरी तव
जणू कोवळी पालवी शहारते

तुझ्या पावलानी नाजूक गुलाबी
पूर्वेच्या गाली उषा लाजते
जादू अशी सोनपिवळ्या उन्हाची
हळद लेवूनी नववधू साजते

कधी धुंद मोहरल्या सांजसमयी
तुझ्या स्वरात अलगूज मनी वाजते
मीलनास आतूर अभिसारिका ती
शुक्र चांदणी क्षितिजी भेटते

लाजरा तुझा स्पर्श जागता मनी
रोमरोमातूनी सतार झंकारते
इथेतिथे सर्वत्र दिसशी मला तू
तुझे रुप मजला नादावते

---- मनिष मोहिले