समस्यापूर्ती पर्व दुसरे - भाग ३

ओठात नाव ज्याचे श्वासासमान यावे
नात्यामध्ये असेही कोणीतरी असावे
*****************************

समस्यापूर्ती पर्व दुसरे - भाग ३

पहिला प्रयत्न
************
किर्ती, धन, प्रतिष्ठा; काही न आड यावे
कृष्णासमान कोणी, मैत्रीतही असावे

गुरूदक्षिणा म्हणूनी, अंगठ्यास सहज अर्पावे
एकलव्यासमान कोणी, शिष्यांमध्ये असावे

निरपेक्ष प्रेम मनीचे, अद्वैत रुप व्हावे
राधेसमान कोणी, हृदयी असे वसावे

ओठात नाव ज्याचे श्वासासमान यावे
नात्यामध्ये असेही कोणीतरी असावे

------ © मनिष मोहिले
#######################

दुसरा प्रयत्न
***********

हातांनी ज्या घडविले, आधार तयांसी व्हावे
म्हाताऱ्या अधू नयनांना, तेज सार्थकतेचे द्यावे

ते प्रेम असे बहुरुपी, सहोदर कधी मित्र असावे
अन् नाते बंधुत्वाचे, जगी विशाल या पसरावे

डोळ्यात पाहता डोळे, शब्दांविण भाव कळावे
अलगूज मनीचे एका, मनी अलगद दुज्या झरावे

ह्या सुंदर नात्यांमधूनी, जगण्याचे शिल्प घडावे
प्रत्येकाने सखा कुणाचा वा सखी कुणाची व्हावे

ओठात नाव ज्याचे श्वासासमान यावे
नात्यामध्ये असेही कोणीतरी असावे

------ © मनिष मोहिले
#######################

तू भेटलीस आणि

Before you came, world was prose. Now, poetry is born.

या मूळ ओळींवरून -

रोज फुलं फुलतच असायची, तू भेटायच्या आधी सुद्धा
पण तू भेटलीस आणि; मी आतून उमलून आलो

रोज पहाट केशरी व्हायचीच, तू भेटायच्या आधी सुद्धा
पण तू भेटलीस आणि; मी प्राजक्ताचा सडा झालो

रोज संध्याकाळ रंगीत व्हायचीच, तू भेटायच्या आधी सुद्धा
पण तू भेटलीस आणि; मी शुक्राचा तारा झालो

दरवर्षी पाऊस पडायचाच, तू भेटायच्या आधी सुद्धा
पण तू भेटलीस आणि; मी स्वत:च श्रावण झालो

जगत होतोच मी गद्यातल्या उताऱ्यासारखा, तू भेटायच्या आधी सुद्धा
पण तू भेटलीस आणि; कविता बनून गेलं; माझं जगणं सुद्धा.

-- © मनिष मोहिले