देवाजीची करणी

गेल्याच आठवड्यात सिक्कीम ट्रीप करून आलो. अप्रतिम निसर्गसौंदर्यानी नटलेल्या सिक्कीम मध्ये पाच सहा दिवस आम्ही फिरत होतो आणि दरक्षणी आम्ही त्या अप्रतिम निसर्गा समोर मनोमन विनम्र होत होतो. परतीच्या दिवशी निघताना सकाळी सकाळी चित्रीत केलेला हा व्हीडिओ म्हणजे सिक्कीमची आम्हाला जणू परतभेट होती.

त्या व्हीडिओत चित्रीत झालेला तो अनुपम नजारा बघून सुचलेली कविता खाली देत आहे.

देवाजीची करणी

धुक्यात ओल्या हरवून गेली; घरे छोटीशी इवली इवली
उचलून पाहती दुलई धुक्याची; बालरवीची किरणे इवली

झाडांच्या शेंड्यात अडकती; मेघ पांढरे, मऊ सावरी
अद्भुताचे दर्शन घडते;  स्वर्ग जणू अवतरे भूवरी

अंग झटकती, पंख पसरती; रानपाखरे इवली इवली
मंजुळ किलबिल त्यांची ऐकूनी; जणू पालवी फुटते इवली

वाहे नदीचे खळखळ पाणी; वारा गाई मधुर गाणी
मनास करते संमोहीत ही; देवाजीची अद्भुत करणी

------- मनिष मोहिले