सुगंधी श्रावण

मेघ सावळे जादू करती
आकाशातून शिंपीत मोती
हवेत ओल्या गंधित प्रीती
पालवी कोवळ रेशीम नाती

अफुट कोवळ्या कळ्या मोगरी
वर्षास्नाने फुलून येती
कृतज्ञ होऊनी जलबिंदूंसह
धुंद सुगंधी श्रावण करती

तुझ्या मखमली अधरांवरती
हळूच माझी बोटे फिरती
तव देहाची वेणू बनता
ओली गीते हळवी बनती

शांतवणाऱ्या संध्याकाळी
रंग अनोखे नभी पसरती
तुझ्या नी माझ्या नात्यामधले
रेशीम धागे रंगीत बनती

-- मनिष मोहिले