आला श्रावण श्रावण

आला श्रावण श्रावण, शेला हिरवा लेवून
सोन पिवळ्या उन्हाची, दिसे किनार सजून

आला श्रावण श्रावण, रिमझिमता पाऊस
नवनवेल्या चुड्याला, लागे माहेराची आस

आला श्रावण श्रावण, देह चिंब चिंब मन
सय सजणाची येता, प्रीत गाली ये फुलून

आला श्रावण श्रावण, सणावारांचा हा मास
दिसे सृष्टीचीही तृप्ती, असा फुलांचा सुवास

आला श्रावण श्रावण,  आसमंत ओला ताजा
शिरपेच सप्तरंगी, मिरवतो ॠतूराजा

---- मनिष मोहिले