वेणू

वेळूच्या या बनात फिरुनी, वारा घुमवी शीळ
वेळूची बनते वेणू, लावता मुखे घननीळ

इवलीशी कुडी वेणूची, परि किमया तिची अपार
ऐकून वेणू कान्हाची, परतसे घरी खिल्लार

आर्त हाक कधी प्रेमाची; कधी मीलन हळूवार
मोहवे वेणू श्रीरंगाची, राधा लाजून चूर

वेणू अधरांचे नाते; जसे सखी प्रियकर
बोल अधरीचे गीत बनवती, वेणूमधले सूर

रूप वेणूचे साधेसे, परि अंतरंग सुंदर
छेद सप्त तिज उरातले, सप्तसुरां माहेर

------------  मनिष मोहिले