रखुमाई

आज ४ जुलै २०१७.आषाढी एकादशी. एका गृपमध्ये गप्पागप्पात माझा मित्र पावशा बोलला की सगळे विठ्ठलावर कविता करतात. कुणी रखुमाईवर करा की.

पावशाच्या कल्पनेला शब्दात पकडायचा प्रयत्न..

विटेवरी उभा देव सावळा विठोबा
राणी रखुमाई त्याची, देव कान्हडा विठोबा

राणी रखुमा समर्थ, हाके संसाराचा गाडा
म्हणोनी युगे अठ्ठावीस, दारी थांबला विठोबा

ज्ञाना, तुका, नामा, चोखा, बंका आणि एका
संत लेकरे लाडकी , बाप साऱ्यान्चा विठोबा

अशा बापासंगे भेटे, लेकरांना माय माता
रखुमाईचा पदर, मोठा आकाशाएवढा

टाळ चिपळीची साथ, विठो राजा राणी रखमा,
साक्षी दोघांच्या प्रेमाची, संथ वाहे चंद्रभागा

-- मनिष मोहिले