श्रावण

"रंग नवा मैत्रीचा" नावाच्या माझ्या एका व्हॉट्सॅप गृप मधील दोघा मैत्राना एका काव्यस्पर्धेत पारितोषिक मिळाले. दोघांच्याही कविता अप्रतिम होत्या.

त्यांच्या कविता वाचून असं लक्षात आलं की पहिल्या दोन काव्यपंक्ती सर्वांसाठी सारख्या असाव्यात.

माझा स्वभाव ग्रीष्माचा
तुझा श्रीमंत श्रावण

ह्या त्या ओळी.

ह्यावरून पुढील कविता प्रत्येकाने स्वतंत्रपणे रचायची होती. तर ह्या दोन ओळींवरून मला सुचलेली कविता --


माझा स्वभाव ग्रीष्माचा
तुझा श्रीमंत श्रावण
भस्मीभूत अनंगाला
पुनर्जन्माचं आंदण

माझा स्वभाव काटेरी
तुझा सुगंधी गुलाब
तुझ्या देखण्या रुपाचा
मिरवितो मी रुबाब

माझी रात अवसेची
तुझी पूनम रुपेरी
तुझ्या गळ्यात शोभती
माझ्या चवदा गं कोरी

माझा वैशाखवणवा
तुझी श्रावणाची वृष्टी
आलिंगता एकमेका
अवघी मोहरते सृष्टी

---- © मनिष मोहिले