एकतारी - समस्यापूर्ती ४

समस्यापूर्ती ४
*************************
नको विठ्ठला त्या नगारे तुतारी
अभंगा पुरेशी असे एकतारी
*************************

नको विठ्ठला त्या नगारे तुतारी
अभंगा पुरेशी असे एकतारी

तुझ्या दर्शनाची विठू; आस एक ऊरी
देह संसारात परि; चित्त तुझ्या द्वारी

सगुण साकार तू वा; निर्गुण निराकारी
मला ना ते ठावे विठू; एक तू अंतरी

काम, क्रोध, माया आदी सहा रिपू भारी
विठू माऊली तू माझी; नेइ मज तारी

थकूनिया गेलो करूनी, देहांची ही वारी
रंगो तुझ्या रंगी रंगा; मुक्त आता करी

स्वार्थी असा मी रे विठो; स्वार्थच विचारी
दीन अनाथांचा जगी; कोण रे कैवारी ?

जात, पात, धर्म, वर्ण; भेदांची ही दरी
वाळवंटी गाडू देता; डोळा दिसे हरी

आषाढ आभाळी डोळी; आषाढाच्या सरी
चराचरी दिसता विठ्ठल; तीच मुक्ती खरी

नको विठ्ठला त्या नगारे तुतारी
अभंगा पुरेशी असे एकतारी

© ------ मनिष मोहिले