प्रीतरंग

मी रंग कसा रे खेळू कान्हा
पुसते राधा कृष्णाला
भरले सारे तुजपाशीच रे
माझ्या पाशी ना उरला

निळा रंग तव देहाचा नी
पितांबराचा हा पिवळा
कुंकुम लाल तिलक भाळी
अन् केसरिया तव शेल्याचा

माथ्यावरचे मोरपीस ते
गृह च असे साऱ्या रंगा
मी रंग कसा रे खेळू कान्हा
पुसते राधा कृष्णाला

तू राधा नी मी कृष्ण असे
की जशी सावली देहाला
रंग सर्व हे तुझेच राधे
तव प्रीतरंगी मी रंगलेला

ऐकून उत्तर कृष्णाचे
लाजली लाल गाली राधा
उरली गरज ना रंगांची नी
श्यामरंगी रंगली राधा

-------- मनिष मोहिले