चिरंतन सत्य - समस्यापूर्ती भाग ५

समस्यापूर्ती भाग ५

केव्हा हसणे, केव्हा रडणे,
कधी सोसणे कळा;
असा चालला ईथे सनातन
सृजनाचा सोहळा
***********************
माझी समस्यापूर्ती -

केव्हा हसणे, केव्हा रडणे,
कधी सोसणे कळा;
असा चालला ईथे सनातन
सृजनाचा सोहळा

केव्हा असणे, केव्हा नसणे
कधी दिसे चंद्रिका
टिपूर चांदणे पुनवेला
अवसेच्या लक्ष तारका

भरतीचे कधी आलिंगन
कधी पदस्पर्श ओहोटीचा (***)
असा धरेशी प्रीतखेळ हा
नित्य सागराचा

फुटती पाने कोवळी केव्हा
गळती येता 'जरा'
वसंतातूनी शिशिरी जाता
ऋतूचक्राचा फेरा

विलीन होइ अँकारी, ये
अँकारातून जन्मा
जीवा शिवाचे मीलन होता
मोक्ष मिळवितो आत्मा

( *** या कडव्यातली मूळ कल्पना बाबा आमटे यांची - भरतीच्या हातांनी मी जीवनाला आलिंगन देतो तर ओहोटीच्या हातांनी मी त्याला पदस्पर्श करतो - ज्वाला आणि फुले.
प्रीत ही बहुरुपी व बहुआयामी असते - म्हणून कधी आलिंगन तर कधी पदस्पर्श .)

-------- © मनिष मोहिले