एक डाव भुलण्याचा

एक डाव भुलण्याचा
बाकी प्रत्येक सांभाळण्याचा
फरक जरी तपशिलात
दरेक संसार साच्याचा

पण खरंच असं असतं का ?
भुलून झालं एकदा की
एकमेकांना नंतर फक्त
सांभाळायचं असतं का ?

सांभाळणं म्हटलं की
आला तिथे अहंकार
देऊ साथ म्हटलं की
होतो सुंदरसा सहकार

स्वत: बरोबर जोडीदाराचं
समजून घ्यावं मी पण
बघता बघता मी अन  तू
होऊन जातात " आपण "

संसारात दरेक दिवशी
एकदा तरी भुलावं
रातराणीचा सुगंध
येतो कुठून शोधावं

आपोआप मग फुलतं नातं
मोहरून बहरतं नातं
बघून प्रत्येक डावाकडे
स्वत:लाच भुलतं नातं

------ मनिष मोहिले
@manishmohile@blogspot.com