संगीत देवाघराचे

कणाकणातून या विश्वाच्या संगीत आहे झरते
जीवनावरी प्रेम जयांचे, ऐकू तयांना येते

मंजुळ किलबिल द्विजगण करती, सुरेल जणू शहनाई
नव दिवसाच्या आरंभाची दशदिशातूनी द्वाही

डोंगर खोरी झाडांमधूनी मंद वाहतो वात
प्रेमधून जणू अवनीसाठी वेणूच्या या बनात

उड्या मारूनी झरा वाहतो खळखळाट खळ खळा
पृथ्वीच्या जणू पायामधला लाडिक घुंगूरवाळा

आगमनाने वर्षा ऋतूच्या येइ मनासी  धुंदी
मेघांच्या पखवाजाशी करे विद्युल्लता जुगलबंदी

देवाघरच्या सूर ताल लयींची सुंदर ही बंदीश
कृतज्ञ होतो मनात मी; अन् झुकते माझे शीश

------  © मनिष मोहिले
@manishmohile.blogspot.com